Duela egun batzuk Israelgo soldaduek jo zituzten. Gaur, berriz, ertzainek. Global Sumud Flotillan parte hartu duten sei euskal herritar gaur ailegatu dira Turkiatik Euskal Herrira. Loiuko (Bizkaia) aireportura iritsi orduko, baina, ertzainak oldartu zaizkie, jo, eta haietako bi eta ongietorria ematera joandako bi lagun atxilotu dituzte. Arratsaldean askatu dituzte laurak. Oposizioak kontuak eskatu dizkio Bingen Zupiria Eusko Jaurlaritzako Segurtasun sailburuari, eta Zupiriak berak eta Segurtasun Sailak ohar bat zabaldu dute arratsean: «Sentitzen dugu Loiuko aireportuan sortu den egoera; ahalik eta lasterren saiatuko gara gertatutakoa eta izan daitezkeen erantzukizunak argitzen». Eusko Legebiltzarreko Segurtasun Batzordean azalpenak emateko baimena eskatu du sailburuak, astearterako.
Ikusi gehiago
Asteetako tentsioa baretzeko eguna zen gaurkoa flotillako kideentzat. Luka Remiro kideak azaldu du hitzokin, liskarren ostean, jo eta abailduta: «72 ordu pasatu ditugu sionisten eskuetan, eta era guztietako torturak egin dizkigute. Bi ekintzaile saihets hezurrak hautsita eta sorbalda lehertuta etorri dira, eta [ertzainek] lehen-lehenik zera egin dute, kolpe gehiago eman. Ospakizuna izan behar zuena kaka zaharra bihurtu dute». Izan ere, Euskal Herritik Gazarantz flotillan joandako bi kide ospitalean egon dira Istanbulen, Israelgo soldaduek eragindako lesioengatik.
Flotillako euskal kideei harrera egiteko dozenaka lagun bildu dira gaur Loiuko aireportuan, Palestinako banderak eskuetan zituztela. 11:00k alderako espero zituzten, eta han egon dira goizetik, baina 14:00ak jo dute ekintzaileak iritsi direnerako. Nerea Etxebarria Global Sumud Euskal Herria taldeko kidea han ibili da, eta goizetik nabaritu dute ertzainen jokabidea ez zela egokia: «Hegazkina atzeratuta heldu zen, eta, hura iritsi baino lehen, Palestinako bandera bat kendu digu Ertzaintzak, eta zenbaiti nortasun agiria eskatu ere bai».
«[Ertzainek] Lehen-lehenik zera egin dute, kolpe gehiago eman. Ospakizuna izan behar zuena kaka zaharra bihurtu dute»
LUKA REMIRO Global Sumud Flotillako kidea
Iritsi dira flotillako kideak, hasi dira aireportuko irteera atean argazkiak egiten elkarrekin, halakoetan ohi denez, eta ertzainek atetik kentzeko eskatu diete. Argazkiak egiten jarraitu dute, baina ertzainak bultzaka hasi dira harrera egitera joandakoei, eta ekintzaile bat haiengana joan denean ertzainek lurrera bortizki bota dute. Eta, haren atzetik, beste kideak.
Harrera egitera joandakoak barrura sartu dira orduan, ertzainek borrak atera dituzte, eta lau lagun atxilotu dituzte. Kamerari eta argazkilariek hartutako irudietan ikusten da lurrean arrastaka eraman dituztela ekintzaileak, borraz lurrean zeuden pertsonak jo dituztela, eta eskuburdinak ere jarri dizkietela batzuei. Atxilotuetako bat, Angel Artola, Deustuko anbulatoriora eraman dute. Eta anbulatorioan, harreran, lurrean botata eduki dute atxilotua bi ertzainek, harrerako mostradorearen kontra; lekukoek grabatu dute nola tratatu dute atxilotua.
Como decíamos al inicio del TD, graves incidentes en el aeropuerto de Bilbao en el momento de la llegada de activistas de la Global Sumud Flotilla.
— Telediarios de TVE (@telediario_tve) May 23, 2026
Los detalles, con @luismijpalao pic.twitter.com/HH4EkKvGYl
«Desobedientzia larria»
Ertzaintzak ohar bat zabaldu du handik gutxira, atxilotuei «desobedientzia larria, erresistentzia eta agintaritzaren aurkako atentatua» egozten dietela jakinarazteko. Eta sinetsi ezinik ibili dira Global Sumud taldeko kideak. Flotillako beste kide batzuk txaloka hartu dituzte, egunotan, beren herrialdeetara itzuli direnean. Gaur, Loiun, Galiziako eta Madrilgo kideak ere lurreratu dira, eta «zur eta lur» zeudela azaldu du Nerea Etxebarriak: «Lotsagarria izan da. Bost minutuko gauza izan da, harrigarria». Ertzainek oso modu «basatian» jokatu dutela azaldu du, harrera egitera joandakoek ez dutelako «inolako probokaziorik» egin: «Nork agindu du horrela jokatzeko? Jendea jipoitzeko eta eskuburdinak jarrita eramateko?».
EH Bilduk eta Ahal Dugu-k deitoratu egin dute ertzainen jokabidea, elkartasuna agertu diete ekintzaileei, atxilotuei, eta haien senide eta lagunei, eta Bingen Zupiriari azalpenak emateko eskatu diote. EH Bildurentzat, flotilla elkartasunaren eta giza eskubideen defentsaren «ikurra» da, eta haien kontrako bortizkeriak ez du inolako «justifikaziorik»: «Ez da onargarria Israelek bahitutako pertsonak Euskal Herrira ailegatzean jotzea eta atxilotzea». Ahal Dugu-k, berriz, ohartarazi du Ertzaintza «patroi bat» sortzen ari dela Palestinako genozidioa salatzeko ekintzen kontra, eta gogorarazi du Espainiako Vueltan ere oldartu zirela ertzainak manifestarien kontra, Bilbon. «Instituzioek ezin diote elkartasun internazionalistari borrekin eta errepresioarekin erantzun».
LAB sindikatuak ere Ertzaintzaren jokabidea salatu du: «Palestinaren aldeko ekintzaileei babesa eta eskertza erakusteko momentua behar zuena lehertu egin du, inolako justifikaziorik gabe. Gertatukoaren gaineko erantzukizuna hartzeko eskatzen diogu Eusko Jaurlaritzari».
Ikusi gehiago
Handik ordu batzuetara zabaldu du Segurtasun Sailak oharra, gertakariengatik sentipena agertuz. Segurtasun Sailak azaldu du Barne Arazoetarako Buruzagitzak ikerketa bat hasi duela gaur bertan, «agenteen jarduera indarrean dauden jarraibideekin bat datorren egiaztatzeko». Horrez gain, Segurtasun Sailak azaldu du gertakarien berri eman diola Euskal Autonomia Erkidegoko Poliziaren Kontrol eta Gardentasun Batzordeari. Eta Segurtasun sailburuak premiazko agerraldia eskatu du Eusko Legebiltzarreko Erakunde, Gobernantza Publiko eta Segurtasun Batzordean, «beharrezko azalpenak emateko». Zupiriak agerraldia datorren asteartean egitea eskatu du, egun horretarako batzorderako deia egina baitago lehendik, beste gai batzuk aztertzeko.
Halere, ertzainen jokabidea zuritu du sailak: azaldu du flotillako kideen harrera ez zitzaiola jakinarazi Ertzaintzari, eta Bilbon egunotan jokatu diren Europako errugbi finaletako «zaleen etorrerekin eta irteerekin batera» suertatu dela haiek iristea. Beti Segurtasun Sailaren hitzetan, harrera egitera bildutako zenbaiten «portaerak aireportuko irteera gunetik alde egiten ari zirenen zirkulazio normala oztopatu» du. Horregatik sortu da «liskarra», haren hitzetan, eta ertzainek «arauzko bastoiak» erabili «behar» izan dituzte, han bildutakoek «erresistentzia» erabili dutelako.
Manifestatzera deitu dute
Atxilotuak Deustuko komisariara eraman dituzte, eta arratsean askatu dituzte. Haietako bat Deustuko anbulatoriora eraman dute, baina hura ere komisariara eraman dute ondoren. Kanpoan bildu dira dozenaka lagun, eta han ere ez da tentsiorik falta izan. Azkenean, askatu dituzte lau atxilotuak, epailearen aurrera agertzeko aginduarekin, eta txaloka hartu dituzte, azkenean ere. Iruñean ere elkarretaratze bat egin dute, 18:30etik aurrera, Errekoleten plazan. Ehunen bat lagun elkartu dira, Palestinako banderekin. Biharko, berriz, Bilbon manifestatzera dei egin dute, Areatzatik abiatuta, Ertzaintzaren tratua salatzeko.
Global Sumud taldeak berak ingelesez zabaldu du ohar bat, Loiuko aireportuko gertakaria salatzeko. Israelen «tortura eta indarkeria fisikoa eta psikikoa» jasan ostean, etxera iritsitakoan «babesa aurkitu beharrean polizia basakeria» aurkitu dutela salatu du. Ertzaintzaren jokabidearen atzean «humanitate gabezia barkaezina» ikusi du taldeak.
Israelgo Atzerri Ministerioak, berriz, Ertzaintzaren oldarraldiaren bideoa zabaldu du sare sozialetan, zinismo argiz idatzitako mezu honekin batera: «Espainiako Gobernuari azalpen bat galdegiten diogu Flotillako anarkistei emandako tratuaz».
